Ubizo kumzi wesipolisa
NANGONA u-Dumile Gwavu wangena esipoliseni kuba abazali bakhe babengenamali yokuba aqhubeke esikolweni, uthi uyawuthanda umsebenzi wakhe.
U-Gwavu, 44, ungu-warrant officer kumapolisa ase-Motherwell, ekwasiso nesithethi samapolisa.
"Lomsebenzi undifundisa indlela yokuthetha nabantu nokwakha ubuhlobo.
"Ndingatsho ndithi eyonanto ndiyithanda kakhuku kulo msebenzi kukunceda abantu. Kumnandi xa abantu besiza neengxaki zabo ndikwazi ukubanceda,” utshilo u-Gwavu.
U-Gwavu uthe wayefuna ukuba ngugqirha wamazinyo, kodwa zange ibekhona imali yokuba aqhubeke nezifundo zakhe.
"Oko ndaphangela apha e-Motherwell ukususela ngo 1990. Ndaba lipolisa kuba kwakunqabe imisebenzi ngelaxesha. Ndandingawuthandi lomsebenzi, ndingayazi ukuba lubizo lwam.”
U-Gwavu unabantwana ababini: u-Sibonakaliso, 14, kunye no-Mvuyisi, 10.
Uthe indawo eziphantsi kweliso lakhe zisixhenxe: i-Motherwell, Swartkops, Kamvelihle, Kwazakhele, New Brighton, Kwadwesi, kunye ne-Kinkelboss
"Nangona owona msebenzi wam ikukusebenzisana nabendaba (media), ndiyabamba xa kufuneka ndibambile.”
Uthe umntu ofuna ukuba lipolisa kufuneka aziphathe kakuhle kwaye athande abantu.