Bavuna iziqhamo zophuhliso
IQELA las'Enjongweni Co-operative lathi lokubona ukunqaba kwamathuba emisebenzi, laziqalela umsebenzi wokulima iigadi kwithafa elise NU5 lincediswa ngumasipala.
Eliqela liqale ukulima ngonyaka ka-2003 limalungu angamashumi amabini ananye, naxa nje ngoku sele linamalungu alishumi ngenxa kuphela, unobangela ikukunqongophala kwezixhobo zokulima.
U-tat'u-Mbulelo Jubase uthe baqala ukulima ezikolweni.
"Ukuqala kwethu okukulima, saqala salima ezikolweni. Sasihamba sikhangela iindawo ezingasetsenziswayo eziyhadini zezizikolo zalapha e-Motherwell. Umasipala waze walibona eliphulo wasinika elithafa silima kulo, kwaye wasinceda nangemali," utshilo u-Jubase.
Nanjengawo nawuphina umbutho baye banazo iingxaki eziye zenze kube nzima ukuba umsebenzi uqhubeke kakuhle.
"Ekuhambeni kwexesha siye sazimela. Into esiyisokolayo ngugandaganda, nto leyo isenza singakwazi ukulima nanini xa sifuna. Lengxaki icutha nengeniso esiyenzayo," utshilo u-Jubase.
Okukhuthazayo kweliqela kukuba isix'esithe vetshe semveliso lisithengisa kumashishini amakhulu afana no-Spar noShoprite.
Ukunqongophala kwemvula mva nje kuyasichaphazela kakubi isivuno seliqela, ubalise watsho uJubase.
Uthe: "Xa zikwi simo esincomekayo noko ingeniso esiyenzayo iyabonakala ngoba iziqhamo zethu zithengwa ngamandla nangalamashishini sidla ngokuwathengisela," utshilo u-Jubase.